នៅថ្ងៃទី ៨ ខែកញ្ញា ឆ្នាំ ២០២២ ថ្មីៗនេះ ក្រុមប្រឹក្សាអភិវឌ្ឍន៍កម្ពុជា ឬហៅកាត់ថា CDC ទើបតែបានសម្រេច ចេញវិញ្ញាបនបត្រចុះបញ្ជីគម្រោងវិនិយោគ តាមសំណើសុំវិនិយោគរបស់ក្រុមហ៊ុន ចំនួន ៥ ដែលក្នុងនោះមានក្រុមហ៊ុនមួយមានគម្រោងវិនិយោគបង្កើតរោងចក្រ ផ្គុំ និងដំឡើងរថយន្ដ នៅរាជធានីភ្នំពេញ។

ក្រុមហ៊ុនវិនិយោគទុនបង្កើតរោងចក្រ ផ្គុំ និងដំឡើងរថយន្ដថ្មីនេះ មានឈ្មោះថា Toyota Tsusho Manufacturing (Cambodia) Co., Ltd ដែលគ្រោងដាក់ទីតាំងសាងសង់រោងចក្រនេះ​ នៅ តំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ, រាជធានីភ្នំពេញ ជាមួយនឹងទុនជាទឹកប្រាក់ ៣៦.៧ លានដុល្លារអាមេរិក។ 

យោងតាមសេចក្ដីប្រកាសរបស់ ក្រុមប្រឹក្សាអភិវឌ្ឍន៍កម្ពុជា មិនបានបង្ហាញព័ត៌មានលម្អិត ពីពេលទំហំនៃការ ផលិត ម៉ូដែលរថយន្ដ និង ពេលវេលានៃការសាងសង់ ព្រមទាំងដាក់ដំណើរការរោងចក្រនៅពេលណានៅឡើយទេ គ្រាន់តែបានឲ្យដឹង ថា វាអាចស្រូបយកកម្លាំងពលកម្មក្នុងស្រុកបាន ១៥០ នាក់។   

គួរបញ្ជាក់ផងដែរថា នេះគឺជារោងចក្រផ្គុំនិងដំឡើងរថយន្ដទី​ ៦ ហើយដែលបានឈានជើងមកវិនិយោគ លើទឹកដីកម្ពុជា ដែលក្រុមហ៊ុន ៥ ទៀតមានដូចជា ក្រុមហ៊ុន HGB Motor, ក្រុមហ៊ុន EM Automobile Co., Ltd., ផ្ដោតលើរថយន្ដធុនធ្ងន់, ក្រុមហ៊ុន K (CAMBODIA) CO., LTD ផ្ដោតលើរថយន្ដ ISUZU, ក្រុមហ៊ុន GTV MOTOR CO., LTD  ផលិតរថយន្ដចិនម៉ាក SOUEAST, FAW និង DONGFENG និង ក្រុមហ៊ុន RMA Cambodia ដែលទើបតែសម្ភោធបើកដំណើរការរោងចក្រតដំឡើងឡាន Ford ក្នុងខេត្តពោធិ៍សាត់កាលពីថ្ងៃទី ១៦ ខែមិថុនាកន្លងទៅ ដែលនេះជាមោទនភាពមួយ បង្ហាញថាវិស័យឧស្សាហកម្មយានយន្ដក្នុងប្រទេសកម្ពុជាបច្ចុប្បន្ន កំពុងតែរីកដុះដាលជាលំដាប់។ 

អត្ថបទ៖ Andra